टोरन्टो: क्यानडाको टोरन्टोस्थित पियर्सन अन्तर्राष्ट्रिय विमानस्थलमा डेल्टा एयरलाइन्सको एक विमान अवतरणको क्रममा दुर्घटनाग्रस्त भएको छ। घटनामा १८ जना घाइते भएका छन्, जसमध्ये २ जनाको अवस्था गम्भीर रहेको बताइएको छ।

उक्त विमान अमेरिकाको मिनियापोलिसबाट टोरन्टोका लागि उडेको थियो। विमानमा ७६ यात्रु र चालक दलका ४ सदस्यसहित ८० जना सवार थिए। अवतरणका बेला विमानको पखेटामा रहेका फ्ल्यापहरू ठीकसँग नखुलेको कारण नियन्त्रण गुमाउँदा दुर्घटना भएको प्रारम्भिक अनुमान गरिएको छ।

दुर्घटनाको समयमा टोरन्टोमा भारी हिमपात भइरहेको थियो। मौसम विभागका अनुसार त्यति बेला हावाको गति ६५ किलोमिटर प्रतिघण्टा रहेको थियो, जसले अवतरणमा थप चुनौती सिर्जना गरेको हुनसक्ने अनुमान गरिएको छ।

क्यानडाको यातायात सुरक्षा बोर्डले घटनाको विस्तृत अनुसन्धान गरिरहेको छ भने अमेरिकी राष्ट्रिय यातायात सुरक्षा बोर्डले पनि अनुसन्धानमा सहयोग गरिरहेको छ।

दुर्घटनापछि टोरन्टो विमानस्थलका २०० भन्दा बढी उडान अस्थायी रूपमा रोकिएका थिए, तर केही घण्टापछि सेवा पुनः सञ्चालनमा आएको विमानस्थल प्रशासनले जनाएको छ।

• Jigyasa media