काठमाडौं । देशका केही भागमा आज वर्षा र हिमपातको सम्भावना रहेको जल तथा मौसम विज्ञान विभागले जनाएको छ। विशेषगरी गण्डकी प्रदेशका पहाडी र हिमाली क्षेत्रहरूमा हल्का वर्षा तथा हिमपात हुन सक्ने अनुमान गरिएको छ।

बिहान कोसी, मधेस र बागमती प्रदेशमा आंशिक बदली देखिएको छ भने बाँकी स्थानहरूमा मौसम मुख्यतः सफा रहेको छ। दिउँसो गण्डकी प्रदेशका केही स्थानमा मेघगर्जन र चट्याङसहित हल्का वर्षा हुनसक्ने तथा उच्च पहाडी र हिमाली क्षेत्रहरूमा हिमपातको सम्भावना रहेको मौसमविद्हरूले बताएका छन्।

कोसी र मधेस प्रदेशमा हावाहुरीको सम्भावना

मौसम पूर्वानुमान अनुसार, अपराह्नपछि कोसी र मधेस प्रदेशका केही स्थानहरूमा हावाहुरी चल्ने सम्भावना रहेको छ। यस्ता मौसमी गतिविधिले दैनिक जनजीवन, स्वास्थ्य, सडक तथा हवाई यातायातमा असर पार्न सक्ने भएकाले सतर्कता अपनाउन विभागले आग्रह गरेको छ।

काठमाडौंको मौसम कस्तो रहने?

काठमाडौं उपत्यकामा भने वर्षाको सम्भावना नरहेको मौसमविद् विनु महर्जनले बताइन्। “आज उपत्यकामा माथिल्लो वायुमण्डलमा बादल छाइरहनेछ, तर यसले वर्षा गराउने सम्भावना छैन,” उनले भनिन्। बिहान उपत्यकामा उच्च स्तरका बादल (हाइक्लाउड) देखिएको र दिउँसो पनि यस्तो नै रहने अनुमान गरिएको छ।

हाल देशभरि पश्चिमी र स्थानीय वायुप्रणालीको आंशिक प्रभाव देखिएको छ। मौसम परिवर्तनका कारण हुनसक्ने जोखिमबाट बच्न आवश्यक सतर्कता अपनाउन विभागले आग्रह गरेको छ।

• Jigyasa media