बैतडी, चैत २३ । बैतडीमा बोलेरो जिप दुर्घटनामा परिँदा एक व्यक्तिको ज्यान गएको छ भने तीन जना घाइते भएका छन्।
देहिमाण्डौँबाट गिरेगडा जाँदै गरेको बा.१.च. ५६५९ नम्बरको बोलेरो जिप दशरथचन्द नगरपालिका–११ अन्तर्गत नानीगाड भन्ने स्थानमा शुक्रबार राति दुर्घटनामा परेको जिल्ला प्रहरी कार्यालय बैतडीले जानकारी दिएको छ।
दुर्घटनामा परी पञ्चेश्वर गाउँपालिका–५ निवासी ५४ वर्षीय चन्चले दयालको उपचारका क्रममा मृत्यु भएको हो। उनलाई जिल्ला अस्पताल पु-याइएपछि राति नै ज्यान गएको प्रहरी निरीक्षक बलराम पाण्डेयले जानकारी दिए।
त्यस्तै दुर्घटनामा परी ५२ वर्षीय लालीराम कोली, ३५ वर्षीय चालक राकेस कोली र ३० वर्षीया कविता परियार घाइते भएका छन्। उनीहरू हाल जिल्ला अस्पताल बैतडीमा उपचाररत छन्।
प्रारम्भिक जानकारीअनुसार जीप अनियन्त्रित भएर सडकबाट करिब ४० मिटर तल खसेको बताइएको छ। घटनाकाे कारणबारे थप अनुसन्धान भइरहेको प्रहरीले जनाएको छ।
- Jigyasa media
