काठमाडौं । काठमाडौं जिल्ला प्रशासन कार्यालयले आज बिहानदेखि चक्रपथभित्र अनिश्चितकालीन कर्फ्यू आदेश जारी गरेको छ ।

प्रमुख जिल्ला अधिकारीको आदेशअनुसार, आज भदौ २४ गते बिहान ८:३० बजेदेखि लागू हुनेगरी कर्फ्यू आदेश जारी गरिएको हो । आदेशले काठमाडौं महानगरपालिकाको बालकुमारी पुलदेखि कोटेश्वर चोक, सिनामंगल, गौशाला, चाबहिल, नारायणगोपाल चोक, गोङ्गबु, बालाजु, स्वयम्भू, कलंकी, बल्खु हुँदै वाग्मती नदी पुलसम्मको सम्पूर्ण चक्रपथ भित्रको क्षेत्रलाई समेटेको छ ।

प्रशासनले कर्फ्यू आदेशको कारणबारे जानकारी दिंदै, सोमबार जेन–जी युवाले सञ्चालन गरेको आन्दोलनका क्रममा प्रहरीको गोली लागेर १९ जनाको ज्यान गएको घटनापछि राजधानीमा थप तनावपूर्ण अवस्था सिर्जना हुन नदिन बाध्य भएर यस्तो निर्णय गरिएको स्पष्ट पारेको छ ।

कर्फ्यू अवधिमा निर्दिष्ट क्षेत्रमा कुनै पनि प्रकारको भीडभाड, सभा–जुलुस, हिँडडुल वा सार्वजनिक गतिविधि गर्न प्रतिबन्ध लगाइएको छ । आदेश उल्लङ्घन गर्ने व्यक्तिमाथि कानून बमोजिम कारबाही हुने चेतावनी प्रशासनले दिएको छ ।

• Jigyasanepal