काठमाडौँ । मकवानपुरको भीमफेदी गाउँपालिका–६ जुरीखेतमा भएको सुमो दुर्घटनामा मृत्यु हुनेको संख्या ६ पुगेको छ। दुर्घटनामा घाइते भएका ९ जनामध्ये ६ जनाले उपचारका क्रममा ज्यान गुमाएका हुन्।
मकवानपुरका प्रहरी प्रवक्ता प्रहरी नायव उपरीक्षक (डीएसपी) पुस्कर बोगटीका अनुसार आइतबार साँझ ५:२० बजेतिर भीमफेदी–कुलेखानी–काठमाडौँ सडक खण्डमा दुर्घटना भएको हो।
काठमाडौँबाट हेटौंडातर्फ आउँदै गरेको ना १ ज १७७८ नम्बरको सुमो अनियन्त्रित भई सडकबाट करिब १०० मिटर तल खोल्सामा खसेको प्रहरीले जनाएको छ।
दुर्घटनामा गम्भीर घाइते भएका ६ जनाको मृत्यु भएको पुष्टि भए पनि मृतकहरूको पहिचान खुल्न बाँकी रहेको प्रहरीले जनाएको छ।
सुमोमा सवार अन्य ३ जना घाइतेको हेटौंडा अस्पतालमा उपचार भइरहेको डीएसपी बोगटीले जानकारी दिए। घाइतेहरूको अवस्था चिकित्सकको निगरानीमा रहेको बताइएको छ।
घटनापछि प्रहरी टोली घटनास्थलमा पुगेको छ भने दुर्घटनाको कारणबारे थप अनुसन्धान जारी रहेको प्रहरीले जनाएको छ। दुर्घटनाले भीमफेदी–कुलेखानी सडक खण्डमा केही समय सवारी आवागमनसमेत प्रभावित भएको थियो।
-
Jigyasanepal
