ग्वाटेमाला सिटी – मध्य अमेरिकी राष्ट्र ग्वाटेमालामा सोमबार भएको एक बस दुर्घटनामा ५५ जनाको ज्यान गएको छ। यात्रु भरिएको बस सान अगस्टिन अकासाग्वास्टलान सहरबाट राजधानी ग्वाटेमाला सिटी जाँदै गर्दा दुर्घटनामा परेको हो।

स्थानीय अधिकारीहरूका अनुसार बस सडकबाट चिप्लिएर झण्डै २० मिटर गहिरो नालीमा खसेको थियो। अग्नि नियन्त्रक अधिकारी एडविन भिल्लाग्रानका अनुसार दुर्घटना अन्य सवारी साधन एकअर्कासँग ठोक्किएपछि भएको बताइएको छ। दुर्घटनापछि बसको आधा भाग पानीमा डुबेको हुँदा यात्रुहरू बाहिर निस्कन सकेनन्।

सरकारी अधिकारीहरूका अनुसार बसमा करिब ७० जना सवार थिए। ग्वाटेमालाका राष्ट्रपति बर्नार्डो अरेभालोले दुर्घटनाप्रति दुःख व्यक्त गर्दै तीन दिनको राष्ट्रिय शोक घोषणा गरेका छन्।

यातायात मन्त्री मिगुएल एन्जल डियाजले प्रारम्भिक अनुसन्धान अनुसार बस ३० वर्ष पुरानो भए पनि यसको सञ्चालन अनुमति अझै वैध रहेको बताएका छन्। दुर्घटनाको विस्तृत कारण पत्ता लगाउन थप अनुसन्धान भइरहेको छ।

• Jigyasa media