काठमाडौं, चैत २७ । १७ वर्षअघि छिमेकीको हत्या गरेर फरार रहेका पर्सा जिल्लाका लोकनाथ साह तेलीलाई प्रहरीले अन्ततः पक्राउ गरेको छ। उनी भारतमा ‘नक्कली साधु’ बनेर एक मन्दिरमा आश्रय लिइरहेका थिए।
केन्द्रीय अनुसन्धान ब्युरो (सीआईबी) का अनुसार, पर्सा जिल्लाको विन्दवासिनी गाउँपालिका–२ निवासी ६२ वर्षीय लोकनाथले २०६४ साल वैशाख २५ गते छिमेकी ढोडा मुखिया विनको गोली हानी हत्या गरेका थिए। हत्या पछिको लामो समय उनी फरार थिए।
प्रहरीले बताएको अनुसार उनी भारतको बिहारस्थित चम्पारण जिल्लाको पिरिया गाउँमा रहेको रामजानकी मन्दिरमा झण्डै एक दशकदेखि पुजारीका रूपमा जीवन बिताइरहेका थिए। उनले साधुको भेषमा आफूलाई लुकाउँदै आएका थिए।
सर्वोच्च अदालतले २०६९ साल कात्तिक २४ गते उनलाई सर्वस्वसहित जन्मकैदको सजाय सुनाएको थियो। नेपाल फर्किएको अवसरमा सीआईबीको टोलीले उनलाई पर्साको वीरगञ्जबाट सोमबार पक्राउ गरी मंगलबार सार्वजनिक गरेको हो।
सीआईबीका प्रहरी उपरीक्षक सुधीरराज शाहीले जनाएअनुसार, पक्राउ परेका तेलीलाई फैसला कार्यान्वयनका लागि जिल्ला अदालत पर्सामा बुझाइएको छ।
- Jigyasa media
