असार ३२, तुलसीपुर —

अमेरिकाको लुइसियानामा हालै भएको कार दुर्घटनामा ज्यान गुमाएका दुई नेपाली विद्यार्थीमध्ये एकजना दाङ, तुलसीपुरका २० वर्षीय रोजिन ओली भएको खुलेको छ। चिकित्सक बन्ने ठूलो सपना बोकेर १० महिना अघि अमेरिका गएका उनी अब कहिल्यै नफर्किने गरी अस्ताएका छन्।

दुर्घटना यही जुलाई १३ तारिख, शनिबार राति ९ बजेतिर अमेरिकी समयअनुसार लुइसियाना राजमार्ग ५०७ को पश्चिममा अवस्थित अमेरिकी राजमार्ग ८० मा भएको हो। वर्षा र हुरीबतासबीच सन्तुलन गुमाएको उनीहरू सवार कार रूखमा ठोक्किएर सडकबाट तल खसेको थियो।

यस दर्दनाक दुर्घटनामा तुलसीपुर उपमहानगरपालिका–४, रक्षाचौर निवासी रोजिन ओली र अर्का नेपाली विद्यार्थी २२ वर्षीय राजन यादवको घटनास्थलमै मृत्यु भएको हो।

उनीहरू लुइसियाना टेक युनिभर्सिटीमा अध्ययनरत थिए।

रोजिनका काका पोषण ओलीका अनुसार, “उनी चिकित्साशास्त्र अध्ययनका लागि अमेरिका गएका थिए। घरमा आमा-बुबा र एकजना दाजु मात्रै छन्। उनी भर्खर १० महिना अघि मात्र अमेरिका गएका थिए, सबैको सपना थिए उनी।”

उनीसँगै मृत्यु भएका राजन यादवको स्थायी ठेगाना सर्लाहीतर्फ रहेको अनुमान गरिएको छ, यद्यपि विस्तृत विवरण अझै खुलेको छैन।

दुर्घटनाको समाचारले दाङ मात्रै होइन, सिङ्गो नेपाली समुदाय शोकमा डुबेको छ। विदेशमा भविष्य खोज्न गएका युवाहरू यति असमयमा मृत्युवरण गर्नु दुःखद मात्र नभई चेतनाको विषय पनि हो।

• Jigyasanepal