काठमाडौं, पुस १४: हाल देशमा पश्चिमी न्यूनचापीय प्रणालीको आंशिक प्रभाव कायम रहेको छ। कोशी प्रदेशसहित पहाडी क्षेत्रहरूमा आंशिकदेखि सामान्य बदली रहेको छ भने अन्य स्थानमा मौसम सफा रहने विभागीय स्रोतले जनाएको छ।

जल तथा मौसम विज्ञान विभागका अनुसार आज दिउँसो देशका पहाडी भूभागहरूमा हल्का वर्षाको सम्भावना छ। साथै, कर्णाली, गण्डकी, र कोशी प्रदेशका उच्च पहाडी तथा हिमाली क्षेत्रमा केही स्थानमा हल्का हिमपात हुनसक्ने देखिएको छ। सुदूरपश्चिम र बागमती प्रदेशका उच्च पहाडी तथा हिमाली क्षेत्रका एक-दुई स्थानमा पनि हिमपातको संकेत गरिएको छ।

रातिको समय पहाडी भूभागहरूमा सामान्य बदली रहने सम्भावना छ। बाँकी स्थानमा भने मौसम सफा रहनेछ। साथै, कोशी र गण्डकी प्रदेशका केही उच्च पहाडी स्थानमा हल्का हिमपात हुने सम्भावना यथावत रहेको छ।

आगामी २४ घण्टाको विश्लेषण अनुसार कर्णाली, गण्डकी, र कोशी प्रदेशका हिमाली क्षेत्रहरूमा हल्का हिमपातको सम्भावना छ। सुदूरपश्चिम र बागमती प्रदेशका उच्च पहाडी क्षेत्रमा पनि यस्तै अवस्था रहने अनुमान गरिएको छ।

विभागले मौसम परिवर्तनबाट प्रभावित हुनसक्ने दैनिक जीवन, कृषि, स्वास्थ्य, सडक यातायात, र हवाई उड्डयनमा सतर्कता अपनाउन आग्रह गरेको छ। सोमबार बिहान तराई क्षेत्र, काठमाडौं उपत्यका, र खोचहरूमा हुस्सु लाग्न सक्ने भएकाले विशेष ध्यान दिन सुझाव दिएको छ।

चिसोमा उचित तयारीका साथ यात्रा गर्नुहोस्।

हिमपात प्रभावित स्थानका बासिन्दालाई विशेष सावधानी अपनाउन अनुरोध।

हुस्सुका कारण सडक तथा हवाई यातायातमा अवरोध आउन सक्ने भएकाले सतर्क रहनुहोला।

• Jigyasa media