काठमाडौं, चैत्र १४ – देशका केही भागमा आज हल्का वर्षा र हिमपातको सम्भावना रहेको जल तथा मौसम विज्ञान विभागले जनाएको छ। अधिकांश स्थानमा भने मौसम सफा रहनेछ।
मौसमविद् हरिप्रसाद दाहालका अनुसार कोसी र गण्डकी प्रदेशका पहाडी क्षेत्रमा हल्का वर्षा हुन सक्ने देखिएको छ। साथै, यी प्रदेशका उच्च पहाडी तथा हिमाली क्षेत्रमा हल्का हिमपातको सम्भावना रहेको छ।
काठमाडौं उपत्यकाको अवस्था
काठमाडौं उपत्यकामा दिउँसो मौसम मुख्यतः सफा रहने अनुमान गरिएको छ। आंशिक बदली भए पनि वर्षाको सम्भावना केही दिनसम्म नरहेको मौसमविद् दाहालले बताएका छन्।
तराईमा हावाहुरीको सम्भावना
दिउँसोपछि तराईका केही स्थानमा हल्का हावाहुरी चल्न सक्ने सम्भावना रहेको छ। यद्यपि, क्षति पुर्याउने खालको ठूलो हावाहुरी भने नआउने अनुमान गरिएको छ।
सावधानी अपनाउन अनुरोध
कोसी र गण्डकी प्रदेशका केही पहाडी क्षेत्रमा मेघगर्जन तथा चट्याङसहित वर्षा हुन सक्ने भएकाले सतर्क रहन जल तथा मौसम विज्ञान विभागले आग्रह गरेको छ।
हाल देशमा पश्चिमी र स्थानीय वायुको आंशिक प्रभाव रहेको छ। यी वायुसँग सम्बन्धित प्रणाली मजबुत नहुँदा व्यापक वर्षा हुन नसकेको मौसमविद्हरू बताउँछन्।
- Jigyasa media
