काठमाडौँ, जेठ २० — देशका विभिन्न स्थानहरूमा पछिल्ला दिनहरूदेखि जारी रहेको वर्षा र मौसम बदलीको क्रम आज पनि कायमै रहने मौसमविद्हरूले बताएका छन्।

मौसम पूर्वानुमान महाशाखाका अनुसार आज मंगलबार (जेठ २०) को दिनभर देशभर आंशिकदेखि सामान्य बदलीको अवस्था रहनेछ। खासगरी कोसी, सुदूरपश्चिम, गण्डकी र कर्णाली प्रदेशका पहाडी भू–भागमा मेघगर्जन र चट्याङसहित हल्कादेखि मध्यम खालको वर्षा हुने सम्भावना रहेको छ।

यस्तै, कोसी र सुदूरपश्चिम प्रदेशका उच्च पहाडी तथा हिमाली भेगहरूमा केही स्थानहरूमा हल्का वर्षा वा हिमपात समेत हुन सक्ने अनुमान गरिएको छ।

🌙 राति पनि वर्षा निरन्तर

साँझपख र रातिको समयमा पनि अधिकांश भू–भागमा आंशिकदेखि साधारण बदली रहनेछ। विशेषगरी कोसी प्रदेशका थोरै स्थानहरूमा, र मधेस, बागमती, गण्डकी र अन्य पहाडी क्षेत्रका एक–दुई स्थानहरूमा मेघगर्जनसहितको हल्कादेखि मध्यम वर्षा हुने सम्भावना रहेको विभागले जनाएको छ। त्यस्तै, देशको उच्च पहाडी तथा हिमाली क्षेत्रका केही स्थानहरूमा रातको समयमा हल्का वर्षा वा हिमपात हुनसक्छ।

💧 कस्तो हुन्छ हल्का र मध्यम वर्षा?

मौसमविद्हरूका अनुसार—

• १० मिलिमिटरभन्दा कम पानी परे हल्का वर्षा,
• १० देखि ५० मिलिमिटरसम्म परे मध्यम वर्षा,
• ५०–१०० मिलिमिटरसम्म भारी वर्षा,
• १००–२०० मिलिमिटरसम्म धेरै भारी वर्षा र
• २०० मिलिमिटरभन्दा बढी पानी परे अति भारी वर्षा मानिन्छ।

सावधानी अपनाऔं: मेघगर्जन, चट्याङ र सम्भावित हिमपातका कारण प्रभावित क्षेत्रका बासिन्दाहरूले सतर्कता अपनाउन मौसमविद्हरूले सुझाव दिएका छन्।

• Jigyasanepal