जिज्ञासा नेपाल, असार ९, कपिलवस्तु
कपिलवस्तुमा सोमबार बिहान भएको एक दर्दनाक ट्रयाक्टर दुर्घटनामा दुई जनाको मृत्यु भएको छ। कपिलवस्तु नगरपालिका–८ पश्चिम दोहनीस्थित सडकमा ट्रयाक्टर अनियन्त्रित भई पोखरीमा खस्दा ज्यान जाने घटना भएको हो।
ना.५ त ३१४० नम्बरको ट्रयाक्टर दुर्घटनामा परी सोही वडाको पश्चिम बेलहवा निवासी ४० वर्षीया दुर्गावती कोरीसहित दुई जनाको ज्यान गएको जिल्ला प्रहरी कार्यालय कपिलवस्तुले जानकारी दिएको छ।
दुर्घटनामा गम्भीर घाइते भएका दुवैलाई तत्कालै जिल्ला अस्पताल तौलिहवामा पुर्याइएको थियो। तर, उपचारका क्रममा दुवै जनाले ज्यान गुमाए। मृतकको परिचयमा रहेका दोस्रो व्यक्तिको नाम भने समाचार तयार पार्दासम्म खुलाइएको छैन।
घटनाको कारणबारे यकिन जानकारी आउन बाँकी रहे पनि प्रारम्भिक अनुमानअनुसार ट्रयाक्टर अनियन्त्रित भएर पोखरीमा खसेको प्रहरीले जनाएको छ। दुर्घटनासम्बन्धी थप अनुसन्धान भइरहेको जनाइएको छ।
स्थानीयहरूका अनुसार सो क्षेत्रको सडक अव्यवस्थित र साँघुरो भएकाले दुर्घटनाको जोखिम उच्च हुने गरेको छ।
-
Jigyasanepal
