पाल्पा — कालीगण्डकी नदीको पाल्पा क्षेत्रमा दुईजनाको शव फेला परेको छ। जिल्ला प्रहरी कार्यालय पाल्पाका अनुसार सिन्धुलीको गोलाचौर गाउँपालिका-६ का २६ वर्षीय भोजराज अस्लामी मगर र दाङको तुलसीपुर उपमहानगरपालिका-३ का ४५ वर्षीय तेजबहादुर रास्कोटी मृत भेटिएका हुन्।
मृतक दुवैजना कालीगण्डकी करिडोर सडक निर्माणमा संलग्न मजदुर रहेको प्रहरी नायब उपरीक्षक सुनिल मल्ल ले जानकारी दिए। भोजराज अस्लामी डोजर अपरेटरका रूपमा कार्यरत थिए। प्रहरीका अनुसार उनी फागुन २६ गते राति क्याम्पमा सुतेका थिए, तर भोलिपल्ट बिहान उनी बेपत्ता भए। पाँच दिनसम्म खोजी गरेपछि शनिबार राति कालीगण्डकी नदीमै उनको शव फेला परेको थियो।
त्यस्तै, तेजबहादुर रास्कोटी नुहाउने क्रममा नदीमा डुबेर बेपत्ता भएका थिए। खोजतलास गर्दा घटनास्थलबाट करिब दुई सय मिटर तल उनको शव भेटिएको प्रहरी नायब उपरीक्षक मल्लले जानकारी दिए।
प्रहरीका अनुसार भोजराज अस्लामीको शव पोस्टमार्टमका लागि टिचिङ अस्पताल, काठमाडौं पठाइएको छ, जबकि रास्कोटीको शव जिल्ला अस्पताल पाल्पामा राखिएको छ। घटनाबारे थप अनुसन्धान भइरहेको प्रहरीले जनाएको छ।
- Jigyasa media
