सर्लाही — पेस्तोल र नक्कली नोटसहित भारत बिहारको सितामढी जिल्ला, मेजरगंज थाना अन्तर्गत बसविटा ग्रामपंचायत, रसुलपुर गाउँका दुई व्यक्तिलाई सर्लाही प्रहरीले पक्राउ गरेको छ। पक्राउ परेका व्यक्तिहरूमा २६ वर्षीय कुन्नु पटेल र ३० वर्षीय मुकेश पटेल रहेका छन्।
गोडैता नगरपालिका–१२ मा नेपाल प्रवेश गर्न लागेका बेला प्रहरीले उनीहरूको साथबाट एक नलकटुवा पेस्तोल, त्यसमा प्रयोग हुने ६ राउन्ड गोली, सानो पेस्तोलका लागि थप ४ राउन्ड गोली र एक हजार दरका २० थान नक्कली नोट फेला पारेको छ।
सर्लाही जिल्ला प्रहरी कार्यालयबाट खटिएको टोलीले उनीहरूलाई नेपालतर्फ आउँदै गर्दा पक्राउ गरेको हो। यस घटनामा थप अनुसन्धान भइरहेको प्रहरी कार्यालयले जनाएको छ।
- Jigyasa media
