हुम्ला । सिमकोट गाउँपालिका–७, डाँडाफयाँमा पशुचौपायामा रेबिज रोगको संक्रमण देखा परेको छ। एक साताअघि नै ४ वटा झोपा (गाई-भैंसीको संकर प्रजाति)को असामयिक मृत्यु भएपछि शंकास्पद रोग पहिचान गर्न पशु अस्पताल तथा पशु सेवा कार्यालय हुम्लाले बिरामी पशुको र्याल परीक्षण गराएको थियो। परीक्षणका क्रममा रेबिज रोग पुष्टि भएको कार्यालयले जानकारी दिएको छ।

पशु अस्पतालका निमित्त कार्यालय प्रमुख कृष्ण रोकायाका अनुसार मृत पशुको कलेजो, आन्द्रा, र फोक्सोमा विशेष लक्षणहरू नदेखिएपछि जिउँदो पशुको र्याल सुर्खेतमा परीक्षणका लागि पठाइएको थियो, जसमा रेबिज देखिएको हो। थप पुष्टि गर्न स्वाब नमुना काठमाडौं पठाइएको छ। रोकायाले रोग नियन्त्रणका लागि आवश्यक १,००० डोज रेबिज खोपको माग गरिएको र त्यसै दिन जिल्लामा खोप वितरण थालिने जानकारी दिएका छन्।

यसैबीच, नाम्खा गाउँपालिका केन्द्र याल्वाङमा ५ वटा कुकुरले ५ जनालाई टोकेको रिपोर्ट आएको र यस स्थानमा १०० डोज रेबिज खोप पठाइएको छ। सिमकोटको ठेहे गाउँमा पनि केही चौपायाको मृत्युको खबर आएको छ, जसको छानबिन भइरहेको छ।

• Jigyasa media