काठमाडौं । बडादसैंको फूलपातीदेखि शुरू भएको सार्वजनिक बिदा सकिएसँगै आजदेखि सरकारी कार्यालयहरू पुनः सञ्चालनमा आउने भएका छन्। सरकारले दसैं पर्वका लागि पाँच दिनको बिदा दिएपछि, आजबाट कार्यालयहरू खुल्दैछन्।
बिदा सकिएपछि सोमबारबाट काठमाडौं उपत्यकामा सवारी आवागमन पनि उल्लेखनीय रूपमा बढेको छ। दसैंको टीका लगाउन उपत्यका बाहिर गएका सर्वसाधारणहरू फर्किन थालेकाले सडकमा सवारीको चाप बढेको हो। बिदाको समयमा करिब १३ लाख सर्वसाधारण उपत्यकाबाट बाहिरिएका थिए।
दसैंको प्रमुख दिन विजयादशमीपछि टीका र जमरा लगाउने परम्परा आश्विन शुक्ल पूर्णिमासम्म चल्ने भएकाले उपत्यकामा फर्कनेहरूको संख्या क्रमशः बढ्ने अपेक्षा गरिएको छ।
- Jigyasa media
