राजविराज, फागुन १० – भारतको उत्तर प्रदेश, गोरखपुर लिंक रोडमा शुक्रबार राति भएको सडक दुर्घटनामा चार नेपाली तीर्थयात्रीको ज्यान गएको छ भने छ जना घाइते भएका छन्।
प्रयागराजमा जारी महाकुम्भ मेलाबाट फर्किँदै गरेका तीर्थयात्री सवार स्कार्पियो गाडी विपरीत दिशाबाट गइरहेको ट्रयाक्टरको पछाडिको ट्रलीमा ठोक्किँदा दुर्घटना भएको हो।
दुर्घटनामा सप्तरीको कञ्चनरुप नगरपालिका–७ की ६४ वर्षीया लिलावती चौधरी, ६५ वर्षीय परशुराम चौधरी, वडा नम्बर ५ की ५५ वर्षीया हरिहरवती यादव र सुनसरीको कुशहा गाउँपालिका–१ की समतोलियादेवी यादवको ज्यान गएको छ।
घटनामा लिलावतीका पति उपेन्द्र नारायण चौधरी, वडा नम्बर ७ की लालु देवी यादव, वडा नम्बर ५ का जितु यादव, मुकेश यादव, उपेन्द्रका बहिनीज्वाइँ तथा चालकसहित छ जना घाइते भएका छन्। उनीहरूको उपचारका लागि गोरखपुरस्थित जिल्ला अस्पतालमा पठाइएको भारतीय सञ्चारमाध्यमहरूले जनाएका छन्।
कञ्चनरुप नगरपालिका–७ का वडाध्यक्ष समानन्द चौधरीका अनुसार मृतकका परिवारका सदस्य शनिबार एम्बुलेन्स लिएर भारत गएका छन्। शव ल्याउन तीनवटा एम्बुलेन्स त्यसतर्फ पठाइएको छ।
- Jigyasa media
