काठमाडौं, चैत २ – काठमाडौंको तीनकुनेमा भएको सडक दुर्घटनामा काभ्रेका एक जनाको मृत्यु भएको छ भने अर्का घाइते भएका छन्।
जिल्ला प्रहरी परिसर, काठमाडौंका एसपी अपिलराज बोहोराका अनुसार, शनिबार बिहान करिब ४:३० बजे तिनकुने गैरीगाउँ पेट्रोल पम्प अगाडि रा १ ख २६२२ नम्बरको टिपरले प्र ३-०२-००३ प ६२४५ नम्बरको मोटरसाइकललाई ठक्कर दिएको थियो।
दुर्घटनामा काभ्रेको पनौती नगरपालिका–११ का सुकराम तामाङ र बेथानचोक गाउँपालिका–६ का रमेश तामाङ गम्भीर घाइते भएका थिए। दुवैलाई तत्काल ट्रमा सेन्टर लगिएको थियो, तर उपचारका क्रममा बिहान ५:३० बजे सुकराम तामाङको मृत्यु भएको छ।
अर्का घाइते रमेश तामाङको उपचार जारी रहेको प्रहरीले जनाएको छ। ठक्कर दिने टिपर विमानस्थल कार्गो क्षेत्रभित्र फेला परेको छ भने चालक भने अझै फरार छन्। घटनाबारे थप अनुसन्धान भइरहेको प्रहरीले जनाएको छ।
- Jigyasa media
