जिज्ञाशा नेपाल, वैशाख १८ –

भारतको कश्मीरस्थित पहलगाममा भएको आतंकी हमलापछि भारत–पाकिस्तानबीच बढ्दो तनावको असर नेपाल–भारत सीमामा समेत देखिन थालेको छ। खुला सीमा भएका कारण घुसपैठको जोखिम बढेपछि नेपाल–भारत सीमावर्ती क्षेत्रमा सुरक्षा सतर्कता तीव्र पारिएको छ।

चार सय ६४ किलोमिटर लामो सीमा कडाइमा

सप्तरीको गोबरगाढादेखि पर्साको ठोरीसम्म फैलिएको मधेश प्रदेशको ४६४ किलोमिटर लामो सीमा भारतको बिहार राज्यसँग जोडिएको छ। यही सीमालाई विशेष चासो दिएर प्रहरी तथा सशस्त्र प्रहरीले संयुक्त सुरक्षा निगरानी बढाएका छन्।

पर्साका प्रमुख प्रहरी उपरीक्षक गौतम मिश्रका अनुसार जिल्लाका नाकामा खटिएका सुरक्षाकर्मीलाई शंकास्पद व्यक्तिको परिचयपत्र अनिवार्य जाँच गर्न निर्देशन दिइएको छ। “सीमानाका थप संवेदनशील बनेका छन्,” उनले भने, “शंका लागेका जोकोहीलाई प्रमाण बिना प्रवेश नदिने नीति लागू गरिएको छ।”

राजनीतिक भेटघाटपछि थप चनाखो सुरक्षा

यसैबीच, भारतीय जनता पार्टी (भाजपा) को विदेश विभाग इन्चार्ज डा. विजय चौथाइवाले नेपाल भ्रमण गर्दै गृहमन्त्री रमेश लेखकसँग भेटघाट गरेका थिए। भेटपछिको परिस्थितिमा सुरक्षामा गरिएको तीव्रता राजनीतिक सन्देश र सावधानी दुवैका रूपमा व्याख्या गरिएको छ।

सशस्त्र प्रहरीको गस्ती, सूचना संकलनमा चासो

मधेश प्रदेश प्रहरी कार्यालयका प्रवक्ता एसएसपी शान्तिराज कोइरालाले पनि उच्च तहबाट प्राप्त निर्देशनअनुसार सीमामा सशस्त्र प्रहरीको गस्ती, निगरानी र खुफिया सूचना संकलनमा जोड दिइएको बताए। “हामी सुरक्षामा कुनै सम्झौता गर्न सक्दैनौं,” उनले भने, “सीमा सुरक्षित राख्न सबै तह सक्रिय छन्।”

• Jigyasanepal