काठमाडौं, ६ कात्तिक: सहकारी ठगी प्रकरणमा संलग्न रहेको आरोपमा नेपाली कांग्रेसका उपसभापति धनराज गुरुङकी ‘पूर्व’ पत्नी ज्योति गुरुङसहित दुई जनालाई पक्राउ गर्न इन्टरपोललाई पत्राचार गरिएको छ। नेपाल प्रहरीको केन्द्रीय अनुसन्धान ब्युरो (सीआईबी) को आग्रहमा नेसनल कन्ट्रोल ब्युरो (एनसिबी)ले इन्टरपोलमा रेड नोटिस जारी गर्न पत्र पठाएको हो।

ललितपुरस्थित मितेरी सहकारीको बचत अपचलनमा अनुसन्धान भइरहेको छ, जसमा गुरुङ तत्कालीन प्रबन्ध निर्देशक थिइन्। सहकारीले बचतकर्ताहरूको १२ करोड ५९ लाख रुपैयाँ हिनामिना गरेको पाइएको छ। यसमा गुरुङसँगै सहकारीका अर्का संलग्न ज्योतिबहादुर भण्डारीविरुद्ध पनि रेड नोटिस जारी गर्न माग गरिएको छ।

धनराज गुरुङले २०७६ सालमा ज्योतिसँग कागजी सम्बन्धविच्छेद गरे पनि व्यवहारिक रूपमा उनीहरूबीचको सम्बन्ध अझै कायम रहेको चर्चा छ। यसलाई सहकारी ठगीबाट उम्किनका लागि गरिएको नक्कली डिभोर्स भनिएको छ। धनराजले डिभोर्सपछि पनि ज्योतिको नाममा ऋण तिरिरहेको बताइन्छ। प्रहरीको अनुसार, ज्योति गुरुङ हाल अमेरिकामा रहेकी छन्।

• Jigyasa media