दाङ, कात्तिक ३ – कपिलवस्तुका भाष्कर पंगेनी र दशरथ साउदले घोराही उपमहानगरपालिका-१५ भरतपुरमा तिहार लक्षित व्यावसायिक सयपत्री फूलखेतीलाई थप विस्तार गरेका छन्।
१७ कट्ठा जमिन भाडामा लिएर गरिएको फूलखेतीमा अहिले सयपत्री ढकमक्क फुल्न थालेपछि, तिहारका लागि फूलको माग बढेको छ। पंगेनी र साउदको फूलबारी पहेँलै भएर, पर्यटक र स्थानीयहरू सेल्फी खिच्न आउँदै रमाइलो गरिरहेका छन्।
साउदले कृषि प्राविधिक अध्ययन गरेर फूलखेतीमा लागेका हुन्। उनले सयपत्रीमा लाग्ने रोगकिरा तथा अन्य प्राविधिक पक्षहरूको निगरानी गर्छन्। तीन वर्षअघि कपिलवस्तुमा सुरु गरेको फूलखेतीलाई उनीहरूले दाङमा विस्तार गर्दै व्यावसायिक बनाएका हुन्।
गत वर्ष तिहारमा मात्रै १३ लाख रुपैयाँ बराबरको फूल बिक्री भएको र ‘टिकटक स्पट’ निर्माण गरेर थप पाँच लाख आम्दानी गरेको साउदले जानकारी दिए। यस वर्ष भने १५ देखि २० लाखसम्मको आम्दानी गर्ने लक्ष्य रहेको छ।
फूल खेतीमा कर्मा-५५५ र कर्मा-९९९ जातका सयपत्री फूलहरू प्रयोग गरिएको छ, जसका लागि ८० हजार रुपैयाँको बीउ थाइल्यान्डबाट ल्याइएको हो। दुई लाख रुपैयाँ बराबरका बिरुवा पहिले नै बिक्री भइसकेको साउदले बताए।
भाष्कर पंगेनीले बेरोजगार युवालाई कृषिमा आकर्षित गर्ने उद्देश्यले ‘एक सय आठ’ अवधारणा अन्तर्गत कृषि फार्म सञ्चालन गरेका छन्। उनीहरू नेपाललाई फूल उत्पादनमा आत्मनिर्भर बनाउन र विदेश निर्यातसम्म विस्तार गर्न चाहन्छन्। तर, स्थानीय चिस्यान केन्द्रको अभावले फूललाई दीर्घकालीन रूपमा भण्डारण गर्न चुनौती रहेको पंगेनीको भनाइ छ।
- RSS
