भदौ १६, काठमाडौं । अफगानिस्तानको पूर्वी क्षेत्रमा आइतबार राति आएको शक्तिशाली भूकम्पले कम्तीमा २० जनाको मृत्यु भएको छ भने सयभन्दा बढी घाइते भएका छन्।

स्थानीय समयअनुसार राति ११:४७ बजे पाकिस्तानसँगको सीमावर्ती नजिक ६ रेक्टर स्केलको भूकम्प गएको हो। नान्गारहार र कुनार प्रान्तमा सबैभन्दा बढी क्षति भएको प्रारम्भिक रिपोर्टमा उल्लेख छ। मृतकको संख्या अझै बढ्न सक्ने आशंका गरिएको छ।

बीबीसीले उद्धृत गरेका अधिकारीहरूका अनुसार दुर्गम ग्रामीण बस्तीमा ठूलो संख्यामा मानिस घाइते भएका छन्। पहिरो र बाढीका कारण उद्धार कार्यमा कठिनाइ भईरहेको छ। कतिपय ठाउँमा सडक सम्पर्क विच्छेद हुनुका साथै मोबाइल नेटवर्कसमेत काम नगरेको जनाइएको छ।

तालिबान प्रशासनले मानवीय संस्थाहरूलाई उद्धार र राहतमा सक्रिय सहभागिता जनाउन अपिल गरेको छ। उद्धार टोलीसँगै घाइतेहरूको उपचारका लागि कुनार प्रान्तमा हेलिकप्टरमार्फत चिकित्सा कर्मचारी पठाइएको छ।

 स्थानीय अधिकारीहरूले मृतक संख्या ‘भयानक’ रहेको बताउँदै, पीडितहरूलाई तत्काल उद्धार र उपचारमा जुट्न अन्तर्राष्ट्रिय सहयोग आवश्यक भएको बताएका छन्।

• Jigyasanepal