बनेपा, जेठ ८ – काभ्रेपलाञ्चोकको बनेपामा अवस्थित नविल बैंकको एटीएम मेसिन फोड्ने प्रयासमा संलग्न एक युवक पक्राउ परेका छन्। एटीएम चोरीको योजना बुनेर मध्यरातमा सक्रिय भएको व्यक्तिलाई प्रहरीको सतर्कताले तत्काल नियन्त्रणमा लिएको हो।

बुधबार राति करिब ११:४५ बजे बनेपा नगरपालिका–७ स्थित नविल बैंकको एटीएममा अज्ञात व्यक्तिले मेसिन फोड्न खोजेको सूचना प्राप्त हुनासाथ इलाका प्रहरी कार्यालय बनेपाबाट खटिएको टोली घटनास्थलमा पुगेर सिन्धुलीको घाङलेख गाउँपालिका–८ निवासी ३० वर्षीय बुद्धिलाल तामाङलाई रंगेहात पक्राउ गरेको हो।

पक्राउ परेका तामाङको साथबाट प्रहरीले मेसिन फोड्न प्रयोग गरिएको रड र हथौडा समेत बरामद गरेको छ। घटनापछि उनलाई बनेपा इलाका प्रहरी कार्यालयको हिरासतमा राखेर थप अनुसन्धान थालिएको प्रहरीले जानकारी दिएको छ।

प्रहरीको तिव्र प्रतिक्रिया र सतर्कताले संभावित ठूलाे आर्थिक क्षति टर्न सफल भएको यो घटना बैंक सुरक्षा प्रणालीप्रति चनाखो हुनुपर्ने संकेत पनि हो। प्रहरीले घटनासँग सम्बन्धित अरु व्यक्ति वा गिरोहबारे समेत अनुसन्धान अघि बढाएको  बताएको छ ।

• Jigyasanepal