काठमाडौं, वैशाख २६ — देशभर मौसममा बदली देखिएको छ। पश्चिमी न्यूनचापीय प्रणाली, स्थानीय वायु तथा पूर्वी भू–भाग नजिक सक्रिय न्यून चापीय क्षेत्रको प्रभावका कारण आज पहाडी र हिमाली क्षेत्रमा वर्षा तथा हिमपातको सम्भावना रहेको मौसमविद्ले बताएका छन्।

मौसम पूर्वानुमान महाशाखा का अनुसार हाल मधेस, बागमती र गण्डकी प्रदेशसहित कोशी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागमा सामान्य बदली रहेको छ भने बाँकी तराई क्षेत्रमा आंशिक बदली छ।

अहिले कोशी, बागमती र लुम्बिनी प्रदेशका केही स्थानमा मध्यम वर्षा भइरहेको छ भने मधेस, गण्डकी र कर्णाली प्रदेशका एक–दुई स्थानमा मेघगर्जन र चट्याङसहित हल्का वर्षा भइरहेको महाशाखाले जनाएको छ।

🌧️ दिउँसो कस्तो रहनेछ मौसम?

आज दिउँसो देशका हिमाली र पहाडी क्षेत्रमा सामान्य बदली रहनेछ भने तराई क्षेत्रमा आंशिक बदली रहने अनुमान गरिएको छ।

कोशी, बागमती र गण्डकी प्रदेशका पहाडी तथा हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ। साथै अन्य प्रदेशका पहाडी तथा हिमाली क्षेत्रमा पनि हल्कादेखि मध्यम वर्षा हुन सक्ने बताइएको छ।

तराई क्षेत्रका एक–दुई स्थानमा पनि मेघगर्जन र चट्याङसहित हल्का वर्षा हुने सम्भावना रहेको महाशाखाले जनाएको छ।

🌙 राति पनि बदली कायम

आज राति कोशी, बागमती र गण्डकी प्रदेशमा सामान्य बदली रहनेछ भने अन्य क्षेत्रमा आंशिक बदली रहने पूर्वानुमान छ।

महाशाखाका अनुसार कोशीसहित बागमती र गण्डकी प्रदेशका पहाडी तथा हिमाली भूभागका केही स्थानमा राति पनि मेघगर्जन, चट्याङसहित मध्यम वर्षा तथा हिमपात हुन सक्नेछ।

⚠️ सतर्कता अपनाउन आग्रह

मौसममा आएको परिवर्तनसँगै चट्याङ, वर्षा र हिमपातका कारण दैनिक जनजीवन, कृषि, पर्यटन तथा यातायात क्षेत्रमा असर पर्न सक्ने भएकाले आवश्यक सावधानी अपनाउन मौसमविद्ले आग्रह गरेका छन्।

• Jigyasanepal