काभ्रे, जेठ १६ । काभ्रे जिल्लाको बेथानचोक गाउँपालिका–१ निवासी २९ वर्षीया गर्भवती महिला बिना स्याङतानको धुलिखेल अस्पतालमा उपचारका क्रममा शनिबार मृत्यु भएको छ। ४१ हप्ताको गर्भ बोकेकी स्याङतानलाई पेट दुख्ने समस्या भएपछि बिहीबार साँझ उपचारका लागि धुलिखेल अस्पताल ल्याइएको थियो।
अस्पताल स्रोतका अनुसार गर्भमा रहेको शिशुले पेटभित्रै दिसा गरेकाले अवस्था जटिल बनेपछि राति ११:१० बजे शल्यक्रिया (अप्रेसन) गरिएको थियो। शल्यक्रियापछि उनलाई सघन उपचार कक्ष (आईसीयू) मा राखेर उपचार गरिए पनि शुक्रबार बिहान ११:३३ बजे चिकित्सकले मृत घोषणा गरेका हुन्।
घटनापछि मृतकका आफन्त तथा स्थानीय गरी करिब ५०–६० जना अस्पताल परिसरमा भेला भई आक्रोश व्यक्त गरेका थिए। शिशुको भने आईसीयूमा उपचार भइरहेको जनाइएको छ। दिउसो अस्पतालमा कार्यरत कर्मचारी माथी तनाव भिड ले आक्रमण समेत गरेका थिए ।
स्थिति तनावपूर्ण बन्न सक्ने सम्भावनालाई ध्यानमा राख्दै जिल्ला प्रहरी कार्यालय काभ्रेबाट प्रहरी निरीक्षक मेहेंगी ल्हामु तामाङको कमाण्डमा ३५ जना प्रहरी परिचालन गरिएको थियो। अस्पताल क्षेत्रमा सुरक्षा व्यवस्था कडा पारिएको प्रहरीले जनाएको छ।
घटनाबारे थप अनुसन्धान भइरहेको छ भने मृतकका आफन्त र अस्पताल प्रशासनबीच छलफल जारी रहेको बताइएको छ।
-
Jigyasanepal
