काठमाडौं। चीनको पूर्वी प्रान्त फुजियानस्थित एक जुत्ता कारखानामा बिहीबार भएको भीषण आगलागीमा कम्तीमा २८ जनाको मृत्यु भएको छ। चिनियाँ सरकारी सञ्चारमाध्यमका अनुसार आगो नियन्त्रणमा आए पनि केही व्यक्ति अझै सम्पर्कविहीन रहेकाले खोज तथा उद्धार कार्य जारी छ।

आगलागी फुजियान प्रान्तको जिनजियाङ शहरमा रहेको हुइटेङ जुत्ता कारखानामा स्थानीय समयअनुसार दिउँसो करिब १२ बजे सुरु भएको थियो। आगो तीव्र रूपमा फैलिँदा भवनभित्र रहेका कामदारहरू बाहिर निस्कन नसकेपछि ठूलो मानवीय क्षति भएको जनाइएको छ।

चीनको सरकारी समाचार संस्था सिन्ह्वाका अनुसार साँझसम्म २८ जनाको मृत्यु पुष्टि भएको छ। अधिकारीहरूले भवनभित्र अझै केही व्यक्ति फसेको आशंका गर्दै उद्धार अभियानलाई तीव्र बनाएका छन्।

घटनापछि राष्ट्रपति सी चिनफिङले आगलागीबाट ठूलो मानवीय क्षति भएको भन्दै घटनाको गम्भीर छानबिन गर्न, जिम्मेवारमाथि कानुनी कारबाही गर्न तथा देशभर औद्योगिक सुरक्षा मापदण्ड कडाइका साथ कार्यान्वयन गर्न निर्देशन दिएका छन्।

विपद् व्यवस्थापन मन्त्रालयका अनुसार घटनास्थलमा १८३ जना उद्धारकर्मी र ३५ वटा उद्धार तथा दमकल सवारी साधन परिचालन गरिएको थियो। आगो नियन्त्रणमा लिन दर्जनौं दमकलकर्मीले घण्टौँ प्रयास गरेका थिए।

चिनियाँ राष्ट्रिय टेलिभिजन सीसीटीभीले प्रसारण गरेको दृश्यमा भवनबाट बाक्लो कालो धुवाँ निस्किरहेको, दमकलकर्मीहरूले बाहिर र भित्रबाट आगो निभाउने प्रयास गरिरहेको तथा केही कामदारहरू भवनको छत र झ्यालमा आश्रय लिएर उद्धारको प्रतीक्षा गरिरहेको देखिएको थियो।

दमकल प्रमुख डु झेन्झाउका अनुसार कारखानाभित्र जुत्ता उत्पादनमा प्रयोग हुने अडेसिभ (टाँस्ने पदार्थ) र अन्य ज्वलनशील कच्चा पदार्थका कारण आगो तीव्र रूपमा फैलिएको थियो। साथै, सामग्रीले भरिएका भर्याङ र आपत्कालीन निस्कने मार्ग अवरुद्ध हुँदा उद्धार टोलीलाई माथिल्लो तलासम्म पुग्न कठिनाइ भएको उनले बताए।

बिहीबार साँझसम्म आगो नियन्त्रणमा आएको जनाइएको भए पनि घाइतेहरूको उपचार, भवनभित्र फसेकाहरूको खोजी तथा घटनाको विस्तृत अनुसन्धान जारी रहेको चिनियाँ अधिकारीहरूले बताएका छन्।

यस घटनापछि राष्ट्रपति सीले पछिल्ला महिनाहरूमा चीनमा भएका औद्योगिक दुर्घटनाबाट गम्भीर पाठ सिक्दै देशभर सुरक्षा व्यवस्थालाई अझ प्रभावकारी बनाउन सम्बन्धित निकायलाई निर्देशन दिएका छन्।

• Jigyasanepal