काठमाडौं, असार १२ — नेपालमा मनसुन विस्तारको गति सुस्त रहे पनि आगामी असार १५ देखि देशका अधिकांश क्षेत्रमा राम्रो वर्षा हुने सम्भावना देखिएको छ। मौसमविद्हरूका अनुसार त्यसपछि मात्र मनसुन सुदूरपश्चिम प्रदेशसम्म पूर्ण रूपमा फैलिने अपेक्षा गरिएको छ।

हाल कोसी, मधेस र बागमती प्रदेशका सम्पूर्ण भूभाग, गण्डकी प्रदेशका केही भाग तथा लुम्बिनी प्रदेशको पूर्वी क्षेत्रका थोरै स्थान मा मनसुनी वायुको प्रभाव रहेको छ। देशका बाँकी भूभागमा भने पश्चिमी तथा स्थानीय वायुको आंशिक प्रभाव कायम रहेको जल तथा मौसम विज्ञान विभागले जनाएको छ।

आजको मौसम

विभागका अनुसार आज दिउँसो देशका हिमाली तथा पहाडी भूभाग र कोसी प्रदेशको तराईमा साधारणतया बदली रहनेछ। मधेस, बागमती र गण्डकी प्रदेशका तराई क्षेत्रमा आंशिक बदली रहने अनुमान गरिएको छ भने लुम्बिनी र सुदूरपश्चिम प्रदेशका तराई भूभागमा मौसम मुख्यतया सफा रहनेछ।

कोसी, बागमती, गण्डकी तथा देशका हिमाली–पहाडी भूभागका थोरै स्थानमा मेघगर्जन, चट्याङसहित मध्यम वर्षा हुने सम्भावना रहेको छ। कोसी प्रदेशको तराई, मधेस प्रदेशका थोरै स्थान तथा बागमती र गण्डकीका तराईका एक–दुई स्थानमा पनि वर्षा हुन सक्ने पूर्वानुमान छ।

यता लुम्बिनी र सुदूरपश्चिम प्रदेशका तराईका केही स्थानमा तातो हावाको लहर (Heat Wave) चल्ने सम्भावना रहेको छ भने बागमती र गण्डकी प्रदेशका तराईका केही क्षेत्रमा तातो दिन (Hot Day) को अवस्था रहने विभागले जनाएको छ।

रातिको अवस्था

राति कोसी, मधेस, बागमती र गण्डकी प्रदेशमा साधारणतया बदली रहनेछ। लुम्बिनी, कर्णाली र सुदूरपश्चिमका हिमाली तथा पहाडी क्षेत्रमा आंशिक बदली रहनेछ भने लुम्बिनी र सुदूरपश्चिमका तराई क्षेत्रमा मौसम मुख्यतया सफा रहनेछ।

कोसी, बागमती र गण्डकीका हिमाली तथा पहाडी भूभागका थोरै स्थान तथा लुम्बिनी प्रदेशका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको छ। कोसी प्रदेशको तराई, मधेसका थोरै स्थान तथा बागमती र गण्डकीका तराईका केही स्थानमा पनि वर्षा हुन सक्ने अनुमान गरिएको छ।

असार १५ बाट मौसममा परिवर्तन

मौसमविद् विनोद पोखरेल का अनुसार पश्चिम तराईका धेरै स्थानमा लामो समयदेखि उल्लेखनीय वर्षा हुन सकेको छैन र यो अवस्था सोमबारसम्म कायम रहने देखिन्छ। तर असार १५ गतेदेखि देशका अधिकांश क्षेत्रमा राम्रो वर्षा हुने सम्भावना रहेको उनले बताएका छन्।

उनका अनुसार मनसुनको प्रभाव त्यसपछि क्रमशः पश्चिम नेपालतर्फ विस्तार हुँदै सुदूरपश्चिम प्रदेशमा पनि पूर्ण रूपमा सक्रिय हुने अपेक्षा गरिएको छ।

सतर्कता अपनाउन आग्रह

मौसमविद्हरूले मेघगर्जन, चट्याङ, स्थानीय वर्षा तथा तातो हावाको लहरबाट बच्न आवश्यक सावधानी अपनाउन आग्रह गरेका छन्। विशेषगरी पहाडी क्षेत्रमा यात्रा गर्ने, नदी आसपास बसोबास गर्ने तथा तराई क्षेत्रमा अत्यधिक गर्मीबाट प्रभावित हुने नागरिकलाई मौसमको नियमित जानकारी लिन सुझाव दिइएको छ।

• Jigyasanepal