काठमाडौं – प्रतिनिधिसभाले बुधबार बसेको बैठकमा सरकारद्वारा जारी गरिएको छ मध्ये पाँच अध्यादेश पारित गरेको छ।
भूमि व्यवस्था, सहकारी तथा गरिबी निवारणमन्त्री बलराम अधिकारीले 'सहकारीसम्बन्धी केही नेपाल ऐनलाई संशोधन गर्ने अध्यादेश, २०८१' स्वीकृत गरियोस् भन्ने प्रस्ताव पेश गरेपछि सभाले बहुमतबाट पारित गर्यो। यसअघि, सांसद चन्दा कार्कीले १२ सांसदको तर्फबाट अस्वीकारको सूचना दर्ता गराए पनि सो प्रस्ताव सभाले अस्वीकृत गर्यो।
मन्त्री अधिकारीले सहकारी क्षेत्रलाई व्यवस्थित गर्न अध्यादेश आवश्यक रहेको बताउँदै प्रतिपक्षलाई अनावश्यक विरोध नगर्न आग्रह गरे। सहकारी पीडितहरूको भावना सम्बोधन गर्दै कानुनी व्यवस्थालाई प्रभावकारी बनाउने उद्देश्यले अध्यादेश ल्याइएको उनले प्रष्ट्याए।
यसैगरी, निजीकरण (पहिलो संशोधन) अध्यादेश, आर्थिक तथा व्यावसायिक वातावरण सुधार तथा लगानी अभिवृद्धिसम्बन्धी अध्यादेश पनि बहुमतले पारित गरियो। अर्थमन्त्री विष्णु पौडेलले यी अध्यादेश पारित गरियोस् भन्ने प्रस्ताव राखेका थिए।
बैठकमा सांसद माधव सापकोटाले निजीकरण अध्यादेश तथा सांसद रणेन्द्र बरालीले आर्थिक वातावरण सुधार अध्यादेश अस्वीकार गरियोस् भन्ने सूचना पेश गरे पनि ती प्रस्ताव अस्वीकृत भए।
- Jigyasa media
