काठमाडौं, जेठ ८ – जेठ ६ गते सिंहदरबारमा बसेको मन्त्रिपरिषद बैठकले आर्थिक सुधारदेखि प्रशासनिक व्यवस्थासम्मका दर्जनौँ महत्त्वपूर्ण निर्णयहरू पारित गरेको छ। बिहीबार मन्त्रिपरिषद निर्णय सार्वजनिक गर्दै सरकारका प्रवक्ता तथा श्रम, रोजगार तथा सामाजिक सुरक्षामन्त्री पृथ्वीसुब्बा गुरुङले ती निर्णयहरूको जानकारी दिएका हुन्।
बैठकले उच्चस्तरीय आर्थिक सुधार सुझाव आयोगको सिफारिसअनुसार तयार गरिएको ‘आर्थिक सुधार कार्यान्वयन कार्ययोजना २०८२’ लाई स्वीकृति दिएको छ। प्रवक्ता गुरुङका अनुसार यो योजनाले देशको आर्थिक पुनःउत्थान र दीर्घकालीन स्थायित्वका लागि मार्गनिर्देशकको भूमिका खेल्ने अपेक्षा गरिएको छ।
त्यस्तै, बागमती सभ्यता एकीकृत विकास समिति सम्बन्धी पाँचौं संशोधन आदेश २०८२ पनि बैठकले स्वीकृत गरेको छ।
सैनिक पक्षमा, नेपाली सेनाको मेडिकल उपसमूह अन्तर्गतका एकजना महासेनानीको पदावधी थप गर्ने निर्णय समेत गरिएको छ।
कर्णाली प्रदेशलाई जग्गा हस्तान्तरण
मन्त्रिपरिषदले सुर्खेत उपत्यका नगर विकास समितिको स्वामित्वमा रहेको जग्गा कर्णाली प्रदेश सरकारलाई उपलब्ध गराउने निर्णय गरेको छ। उक्त जग्गा मुख्यमन्त्री तथा मन्त्रिपरिषद कार्यालयको प्रशासकीय भवन निर्माणमा प्रयोग गरिनेछ।
उद्योगमन्त्रीको चिन भ्रमण स्वीकृत
बैठकले उद्योग, वाणिज्य तथा आपूर्ति मन्त्री दामोदर भण्डारीलाई चीनमा आयोजना हुने एक कार्यक्रममा सहभागिता जनाउन स्वीकृति दिएको छ। मन्त्री भण्डारी जेठ ११ देखि १९ गतेसम्म चीन भ्रमणमा रहने छन्।
-
Jigyasanepal
