काठमाडौं – इन्डियन प्रिमियर लिग (आईपीएल) मा पञ्जाब किङ्सले गुजरात टाइटन्सलाई ११ रनले पराजित गर्दै सानदार जित दर्ता गरेको छ।
अहमदाबादस्थित नरेन्द्र मोदी स्टेडियममा टस हारेर पहिला ब्याटिङ गरेको पञ्जाबले २० ओभरमा ५ विकेट गुमाउँदै २४३ रनको विशाल योगफल तयार गर्यो। २४४ रनको लक्ष्य पछ्याएको गुजरात टाइटन्सले निर्धारित २० ओभरमा ५ विकेटको क्षतिमा २३२ रन मात्र बनाउन सक्यो।
अन्तिम ओभरमा नाटकीय मोड
अन्तिम ओभरमा गुजरातलाई जितका लागि २७ रन आवश्यक थियो। तर, पञ्जाबका बलर अर्शदिप सिंहले उत्कृष्ट बलिङ गर्दै २ विकेट लिँदै खेल आफ्नो पक्षमा ल्याए।
गुजरातका ओपनर साई सुदर्शनले सर्वाधिक ७४ रन जोडे। उनले ४१ बलमा ५ चौका र ६ छक्का प्रहार गरे। कप्तान शुभ्मन गिलसँग पहिलो विकेटका लागि ६१ रनको साझेदारी गरेका उनले जोस बटलरसँग दोस्रो विकेटका लागि ८४ रनको महत्त्वपूर्ण साझेदारी गरे।
गिलले १४ बलमा ३३ रन बनाएर क्याच आउट भए भने जोस बटलरले अर्धशतकीय ५४ रनको योगदान दिए। सर्फान रदरफोर्डले ४६ रन बनाएर बोल्ड आउट भए। शाहरुख खान ६ रनमा तथा अर्सद खान १ रनमा अविजित रहे।
पञ्जाबका बलर अर्शदिप सिंहले सर्वाधिक २ विकेट लिए भने मार्को जेन्सेन र ग्लेन म्याक्सवेलले समान १–१ विकेट हात पारे।
पञ्जाबको ब्याटिङ विस्फोटक
पहिले ब्याटिङ गरेको पञ्जाबका लागि कप्तान श्रेयस अय्यरले उत्कृष्ट प्रदर्शन गरे। उनले ४२ बलमा ५ चौका र ९ छक्का प्रहार गर्दै ९७ रनको अविजित इनिङ्स खेले।
ओपनर प्रियांश आर्यले ४७ रन बनाए भने प्रविशिमरन सिंह ५ रनमै आउट भए। अज्मतुल्लाह ओमराजीले १६, मार्कस स्टोइनिसले २० रन बनाउँदा शशांक सिंह ४४ रनमा अविजित रहे।
गुजरातका लागि साई किशोरले ३ विकेट लिए भने कागिसो राबडा र राशिद खानले १–१ विकेट हात पारे।
- Jigyasa media
