काठमाडौं: एसियन सिनियर कराते च्याम्पियनसिपमा रजत पदक जितेर स्वदेश फर्किएकी कराते खेलाडी एरिका गुरुङलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ। चीनको हाङझाओ शहरमा सम्पन्न प्रतियोगितामा गुरुङले ६८ केजी माथिको तौल समूहमा उत्कृष्ट प्रदर्शन गर्दै फाइनलमा भियतनामकी नाओन थि नुयेनसँग ६-० ले पराजित भइ रजत पदक जितेकी थिइन्।
विमानस्थलमा राष्ट्रिय खेलकुद परिषद्का सदस्य सचिव टंकलाल घिसिङ, नेपाल कराँते महासंघका अध्यक्ष युवराल लामा लगायतका अधिकारीहरूले गुरुङलाई स्वागत गरेका थिए। गुरुङले गोल्ड मेडलको लक्ष्यसाथ खेलेपनि रजत पदक जित्न सफल भएकी थिइन्। उनले आगामी दिनमा अझ उत्कृष्ट प्रदर्शन गर्ने प्रतिबद्धता व्यक्त गरिन्।
त्यसैगरी, एसियन जुनियर कराते च्याम्पियनसिप र एसियन पारा कराते च्याम्पियनसिपमा सहभागी खेलाडीहरूलाई पनि स्वागत गरियो। सदस्य सचिव घिसिङले पदक विजेता खेलाडीहरूको उच्च प्रदर्शनको प्रशंसा गर्दै उनीहरूलाई छिट्टै पुरस्कार प्रदान गरिने जानकारी दिए। साथै, एरिकाको आगामी अन्तर्राष्ट्रिय प्रतियोगिताहरूका लागि तयारीमा विशेष सहयोग गर्ने प्रतिवद्धता व्यक्त गरे।
नेपाल कराँते महासंघका अध्यक्ष लामाले खेलाडीहरूको प्रदर्शनसँगै नेपालका खेलहरूको भविष्यलाई थप सुदृढ बनाउँदै लैजानुपर्नेमा जोड दिए।
- Jigyasa media
