काठमाडौं । घरेलु मैदान, हर्षको उत्साह, जितको लय — तर अन्त्यमा खेलको मैदान होइन, आकाशको बदलो निर्णायक बन्यो। आईसीसी यू–१९ विश्वकप क्रिकेटको एसिया छनोटको अन्तिम खेल आज शनिबार अफगानिस्तानसँगको भिडन्त हुनुअघि नै वर्षाले रोकियो, र त्यससँगै नेपालको विश्वकप यात्रा पनि रोकियो।

कीर्तिपुर रंगशालामा बिहान ९ः३० बजेबाट सुरु हुने तालिका रहेको निर्णायक खेल वर्षाले रद्द भयो। जसले नेपाल र अफगानिस्तान दुवैलाई १–१ अंक बाँडिदियो। दुवै टोलीको अंक ७–७ भए तापनि रनरेटमा अगाडि रहेको अफगानिस्तानले विश्वकपको टिकट पायो।

नेपालले यस प्रतियोगितामा प्रभावशाली प्रदर्शन गर्दै युएईलाई ५ रनले, ओमनलाई ८ विकेटले र हङकङलाई ९ विकेटले पराजित गरिसकेको थियो। अफगानिस्तानले पनि हङकङ र ओमनलाई ८ विकेटले र युएईलाई भारी १८० रनले हराउँदै रनरेटमा अग्लो उचाइ बनायो।

तर, नेपालका युवा खेलाडीहरुको जुझारुपन, प्रतिबद्धता र खेलप्रतिको समर्पण भने वर्षाले पनि धुने सक्दैन। मैदानमा वर्षाले खेल रोकेको हो, तर युवाको साहस र भावी सम्भावनामा कुनै रोकावट छैन।

क्रिकेटको भाग्य कहिलेकाहीँ खेलको नियमभन्दा बाहिरकाले लेख्छ — र आज त्यो वर्षा थियो। यद्यपि, नेपाली क्रिकेटप्रेमीहरुको मनमा यो टीमले आशा, गर्व र भविष्यको उज्यालो सम्भावनाको बिजारोपण गरिदिएको छ।

• H