काठमाडौं । त्रिवि क्रिकेट मैदानमा बिहीबार सम्पन्न त्रिदेशीय टी-२० अन्तर्राष्ट्रिय सिरिज अन्तर्गतको पहिलो खेलमा नेपाल २० रनले पराजित भएको छ।
१५८ रनको लक्ष्य पछ्याएको नेपालले निर्धारित २० ओभरमा १३७ रन मात्र जोड्न सक्यो। नेपालको तर्फबाट सीता राना मगरले सर्वाधिक २८ रन बनाइन् भने कविता जोशीले २७, पूजा महतोले २४ र रुविना क्षेत्रीले ११ रन जोडे। अन्य खेलाडीले उल्लेखनीय प्रदर्शन गर्न सकेनन्।
यसअघि, टस हारेर पहिले ब्याटिङ गरेको नेदरल्यान्ड्सले ४ विकेटको क्षतिमा १५७ रन बनायो। टोलीका लागि रोविने रिज्केले अविजित ५९ रन, स्टेरी कालिसले २९, हिदर सिजर्सले २३ र इरिस ज्विलिङले अविजित ३१ रन बनाए।
नेपालले आफ्नो अर्को खेल थाइल्यान्डविरुद्ध खेल्नेछ।
- Jigyasa media
