बैतडी, ७ मंसिर – नेपाल विद्युत् प्राधिकरण बैतडी वितरण केन्द्रले करिब ६ सय ग्राहकको विद्युत् लाइन काट्ने तयारी गरेको छ। विद्युत् प्रयोग गरे पनि महसुल नतिर्ने ग्राहकहरूबाट ८० लाखभन्दा बढी बक्यौता उठाउन बाँकी रहेको भन्दै केन्द्रले यस्तो कदम चालेको हो।
प्राधिकरणका अनुसार, ६० दिनभन्दा बढी समयदेखि महसुल नतिर्ने ५७९ ग्राहकले कुल ८० लाख ९९ हजार तीन सय ६२ रुपैयाँ बक्यौता तिर्न बाँकी छ। तीमध्ये ४९५ निजी ग्राहकबाट ६३ लाख ८० हजार एक सय २६ रुपैयाँ र ८४ वटा सरकारी कार्यालयबाट १७ लाख १९ हजार दुई सय ३५ रुपैयाँ असुल गर्न बाँकी रहेको छ।
प्राधिकरणका प्रमुख जनार्दन पौडेलले समयमै महसुल नतिर्ने ग्राहकहरूको लाइन काट्ने कार्य सुरु भइसकेको जानकारी दिए। "मिटर रिडिङ भएको ६० दिनभित्र महसुल तिर्ने व्यवस्था छ। यदि सो समयावधिमा रकम नतिरेमा लाइन काट्ने नीति अनुरूप कारबाही अघि बढाइएको छ," उनले भने।
गत आर्थिक वर्षमा पनि महसुल नतिर्ने ग्राहकहरूको लाइन काटेर ६४ लाख रुपैयाँ बक्यौता असुल गरिएको थियो। लाइन काटिएपछि महसुल तिर्ने ग्राहकहरूलाई पुनः लाइन जोडिदिने प्राधिकरणको नीति छ।
बैतडीका सदरमुकाम र पाटन क्षेत्रमा रहेका सरकारी कार्यालयहरूमध्ये पनि अधिकांशले बक्यौता तिर्न बाँकी रहेकोले यसपालि थप कडाइ गरिने जनाइएको छ।
ग्राहकहरूले समयमै महसुल नबुझाए प्राधिकरणको कठोर कदमले विद्युत् आपूर्तिमा अवरोध पुर्याउन सक्ने संकेत छ।
- Jigyasa media
