धनगढी, २३ भदौ – कैलालीको धनगढीमा इन्धन बोक्ने ट्याङ्करका चालक र सहचालकमाथि अज्ञात समूहले धारिलो हतियार प्रहार गरी गम्भीर घाइते बनाएका छन्। ना ६ ख ९४०६ नम्बरको ट्याङ्करमा सवार चालक हरेन्द्र देउवा र सहचालक अनिल देउवामाथि आक्रमण भएको हो। दुबै घाइतेलाई माया मेट्रो अस्पताल धनगढीमा उपचार भइरहेको छ।
जिल्ला प्रहरी कार्यालय कैलालीका प्रमुख एसपी पदमबहादुर विष्टका अनुसार ट्याङ्कर पार्किङको विषयमा विवाद हुँदा आक्रमण भएको हो। घटनामा संलग्न दुई जनालाई प्रहरीले नियन्त्रणमा लिएको छ। थप सोधपुछपछि घटनाको कारण खुलासा गरिने एसपी विष्टले बताएका छन्।
यस आक्रमणले ट्याङ्करको अघिल्लो भागको सिसा समेत फुटेको छ भने केही अन्य ट्याङ्करहरूमा पनि तोडफोड गरिएको छ।
- Jigyasa media
