काठमाडौँ । राजधानी काठमाडौंसहित उपत्यकामा चिसो क्रम अझ तीव्र बन्दै गएको छ। मंगलबार बिहान गरिएको सुरुवाती मापनमा काठमाडौं उपत्यकाको न्यूनतम तापक्रम हिजोको तुलनामा करिब २ डिग्री सेल्सियसले घटेको पाइएको छ।

मौसम पूर्वानुमान महाशाखाले दिएको जानकारीअनुसार आज बिहान ५:४५ बजे गरिएको सुरुवाती मापनमा उपत्यकाको न्यूनतम तापक्रम ५.५ डिग्री सेल्सियस कायम भएको छ। सोमबार यही समयमा उपत्यकाको न्यूनतम तापक्रम ७.३ डिग्री सेल्सियस थियो।

यद्यपि, सोमबार बिहान ८:४५ बजे गरिएको आधिकारिक मापनमा भने काठमाडौं उपत्यकाको न्यूनतम तापक्रम घटेर ६.८ डिग्री सेल्सियस पुगेको थियो। मौसमविद्हरूका अनुसार आज पनि बिहान ८:४५ बजे पुनः आधिकारिक मापन हुने भएकाले तापक्रम अझै घट्ने सम्भावना उच्च रहेको छ।

लगातार घट्दो तापक्रमका कारण उपत्यकामा चिसो बढ्दै गएको छ। विशेषगरी बिहान र साँझको समयमा चिसो हावाले सर्वसाधारणको जनजीवन प्रभावित हुन थालेको छ। मौसमविद्हरूले चिसोबाट बच्न न्यानो लुगा प्रयोग गर्न र स्वास्थ्यप्रति सतर्क रहन आग्रह गरेका छन्।

• Jigyasanepal