पोर्ट सुडान – सुडानको दक्षिणी क्षेत्रमा अर्धसैनिक हमलाले तीन दिनमा २०० भन्दा बढी नागरिकको ज्यान लिएको छ। युद्धको निगरानी गर्ने कानूनी समूहका अनुसार यस आक्रमणमा महिला र बालबालिका पनि परेका छन्।
इमर्जेन्सी लयर्स नामक अधिकार समूहका अनुसार र्यापिड सपोर्ट फोर्सेस (RSF) ले ह्वाइट नाइल राज्यको अल-कदारिस र अल-खेलवात गाउँहरू मा आक्रमण गरेको हो। ती क्षेत्रहरूमा कुनै सैन्य उपस्थिति नभए पनि निहत्था नागरिकलाई निशाना बनाइएको बताइएको छ।
लुटपाट, अपहरण र नरसंहारको आरोप
शनिबारदेखि जारी आक्रमणमा हत्या, अपहरण, जबरजस्ती बेपत्ता पार्ने कार्य र व्यापक लुटपाट भएको रिपोर्ट छ। आक्रमणका कारण सयौँ घाइते भएका छन् भने थुप्रै व्यक्ति बेपत्ता छन्।
वकिल समूहका अनुसार केही स्थानीयवासी नाइल नदी पार गरेर भाग्ने क्रममा गोलीको शिकार बनेका छन्। डुबेर ज्यान गुमाउने घटनाहरू पनि रिपोर्ट भएका छन्।
दुई वर्षदेखि चलिरहेको गृहयुद्ध
सन् २०२३ को अप्रिलदेखि सुडानी सेना प्रमुख अब्देल फत्ताह अल-बुरहान र अर्धसैनिक RSF कमान्डर मोहम्मद हमदान डाग्लो का सेनाहरूबीच संघर्ष जारी छ।
दुवै पक्षमाथि मानव अधिकार उल्लंघन तथा युद्ध अपराधको आरोप लाग्दै आएको छ।
मानवीय संकट गहिरिँदै
यस गृहयुद्धका कारण दशौँ हजारले ज्यान गुमाएका छन्, जबकि १ करोड २० लाखभन्दा बढी नागरिक विस्थापित भएका छन्। इन्टरनेसनल रेस्क्यु कमिटीले यसलाई ‘अहिलेसम्मको सबैभन्दा ठूलो मानवीय संकट’ को रूपमा चित्रण गरेको छ।
- Jigyasa media
