काठमाडौं, वैशाख २३ — देशभर मौसममा परिवर्तन देखिएको छ। पश्चिमी र स्थानीय वायुको प्रभावसँगै पूर्वी भू–भाग नजिक रहेको न्यूनचापीय क्षेत्र सक्रिय हुँदा आज विभिन्न प्रदेशमा वर्षाको सम्भावना देखिएको हो।

मौसम पूर्वानुमान महाशाखा का अनुसार हाल मधेस, बागमती, गण्डकी, लुम्बिनी र कर्णाली प्रदेशका पहाडी तथा हिमाली क्षेत्रमा सामान्य बदली रहेको छ भने तराईका बाँकी भागमा आंशिक बदली छ। यसैबीच कोशी र बागमती प्रदेशका एक–दुई स्थानमा हल्का वर्षा भइरहेको छ।

🌧️ दिउँसोको अवस्था

आज दिउँसो कोशी, मधेस, बागमती, गण्डकी र लुम्बिनी प्रदेशसहित देशका पहाडी तथा हिमाली क्षेत्रमा सामान्य बदली रहनेछ भने तराई क्षेत्रमा आंशिक बदली रहनेछ।

यी प्रदेशका केही स्थान तथा अन्य क्षेत्रमा पनि मेघगर्जन र चट्याङसहित मध्यमसम्म वर्षा र हिमपातको सम्भावना रहेको छ।

🌙 रातिको पूर्वानुमान

आज राति कोशी प्रदेशलगायत पहाडी र हिमाली क्षेत्रमा सामान्य बदली रहनेछ भने अन्य क्षेत्रमा आंशिक बदली रहनेछ।

कोशी, मधेस, बागमती र गण्डकी प्रदेशका केही स्थानमा मेघगर्जन–चट्याङसहित मध्यम वर्षा हुने सम्भावना छ भने अन्य हिमाली क्षेत्रमा हल्का वर्षा र हिमपात हुन सक्छ।

⚠️ सतर्कता अपनाउन आग्रह

कोशी, मधेस, बागमती, गण्डकी र लुम्बिनी प्रदेशका केही स्थानमा मध्यम वर्षा तथा चट्याङको सम्भावना रहेकाले आवश्यक सावधानी अपनाउन विभागले अनुरोध गरेको छ।

मौसमको यस अवस्थाले दैनिक जनजीवन र यात्रामा असर पार्न सक्ने भएकाले सर्वसाधारणलाई सचेत रहन आग्रह गरिएको छ।

• Jigyasanepal