काठमाडौँ । आज असोज ३ गते, संविधान दिवस तथा राष्ट्रिय दिवसका अवसरमा देशभर विशेष कार्यक्रम हुँदैछ।
यस वर्षको संविधान दिवस सैनिक मञ्च, टुँडिखेलमा राष्ट्रपति रामचन्द्र पौडेलको प्रमुख आतिथ्यतामा बिहान ८ः३० बजे विशेष समारोहमार्फत मनाइँदैछ। समारोहलाई प्रधानमन्त्री सुशीला कार्कीले सम्बोधन गर्ने तय भएको छ। यद्यपि, अहिलेको विशेष राजनीतिक परिस्थितिलाई दृष्टिगत गर्दै यसपटक झाँकीलगायत आकर्षक प्रस्तुति भने स्थगन गरिएको छ।
नेपालको संविधान २०७२, लामो सङ्घर्ष र नेपाली जनताको बलिदानीपूर्ण यात्रापछि २०७२ असोज ३ गते तत्कालीन राष्ट्रपति डा. रामवरण यादवले संविधानसभा भवन, नयाँ बानेश्वरस्थित अन्तर्राष्ट्रिय सम्मेलन केन्द्रबाट घोषणा गरेका थिए। दोस्रो संविधानसभाबाट पारित उक्त संविधानले संघीय लोकतान्त्रिक गणतन्त्रात्मक व्यवस्थालाई संस्थागत गरेको थियो।
यस अवसरमा सरकारले आज देशभर सार्वजनिक बिदा दिएको छ। संविधान दिवसलाई ऐक्यबद्धता, उपलब्धिको सम्झना र लोकतान्त्रिक मूल्यको पुनःसङ्कल्पका रूपमा मनाउने परम्परा विगतका वर्षझैँ यसपटक पनि कायम राखिएको छ।
👉 संविधान दिवसलाई राष्ट्रिय एकता, लोकतन्त्र र स्थायित्वको आधारशिला मानिँदै आएको छ।
-
Jigyasanepal
