काठमाडौं। नेपाल साफ यू-२० च्याम्पियनसिपको फाइनलमा प्रवेश गरेको छ। आइतबार एन्फा कम्प्लेक्समा भएको खेलमा नेपालले पेनाल्टी सुटआउटमा भुटानलाई ४-१ गोलले पराजित गर्दै फाइनलमा स्थान बनाएको हो।
निर्धारित ९० मिनेटको खेल १-१ को बराबरीमा टुंगिएपछि खेलको नतिजा पेनाल्टी सुटआउटबाट लिइयो। पेनाल्टी सुटआउटमा नेपालका राम थापा, अविनाश स्याङ्गतान, सीमान्त थापा, र जियारथ शेखले गोल गरे भने भुटानका तर्फबाट जेत्सुन दोर्जी मात्र गोल गर्न सफल भए।
नेपालका गोलकिपर जियारथ शेखले भुटानका दुई पेनाल्टी बचाउँदै खेलका नायक बने। अब नेपालले भारत र बंगलादेशबीचको दोस्रो सेमिफाइनलको विजेतासँग फाइनल खेल्नेछ। फाइनल खेल आगामी बुधबार हुनेछ।
- Jigyasa media
