धनगढी, भदौ १६ – शनिबार राति धनगढीमा भएको मोटरसाइकल दुर्घटनामा एक युवकको मृत्यु भएको छ भने एक जना घाइते भएका छन्।
गोदावरी नगरपालिका-१ धनगढी रोडस्थित पाठक पेट्रोल पम्प नजिकै राति करिब सवा एक बजेतिर ना४ख ९६३ नम्बरको ट्रकमा से५प ५८२७ नम्बरको मोटरसाइकल ठोक्किँदा दुर्घटना भएको हो।
धनगढी उपमहानगरपालिका-२ भन्सार रोडका २९ वर्षीय कैलाश थापाको दुर्घटनामा मृत्यु भएको जिल्ला प्रहरी कार्यालय कैलालीका प्रवक्ता डिएसपी कबिन्द्रसिंह बोहोराले जानकारी दिए। थापालाई गम्भीर अवस्थामामा सेती प्रादेशिक अस्पताल पुर्याइए पनि उपचारका क्रममा उनको मृत्यु भएको हो।
मोटरसाइकलमा पछाडि सवार सोही ठाउँका २५ वर्षीय भुपेश पाल घाइते भएका छन्। उनको अत्तरिया स्थित पद्मा अस्पतालमा उपचार भइरहेको छ।
प्रहरीले दुर्घटनामा संलग्न ट्रक र चालक बझाङको वित्थडचिर गाउँपालिका-२ निवासी भरत बोहोरालाई नियन्त्रणमा लिएको छ।
- Jigyasa media
