कालीकोट – कर्णाली राजमार्गअन्तर्गत कालीकोटको तिलागुफा–५ खल्लागाडमा आज दिउँसो हाइस दुर्घटना हुँदा आठ जना घाइते भएका छन्।
जुम्लाबाट सुर्खेततर्फ जाँदै गरेको कर्णाली प्रदेश ०२००१ ख ००९८ नम्बरको हाइस गाडी दुर्घटनामा परेको हो। जिल्ला प्रहरी कार्यालयका अनुसार दुर्घटनामा घाइते भएका आठमध्ये पाँच जनाको अवस्था गम्भीर छ।
हाइसमा १८ जना सवार थिए। घाइते हुनेहरूमा सिञ्जा–३ का ५२ वर्षीय धनमाने सार्की, ६० वर्षीय मनजिते सार्की, ६५ वर्षीया जर्मा सुनार, ६४ वर्षीया मनकन्या चौलागाईं, जुम्ला कनकासुन्दरी–६ का ३९ वर्षीय कर्ण भण्डारी, कालीकोटका तिलप्रसाद न्यौपाने, जयचन्द्र चौलागाईं र पूर्णप्रसाद चौलागाईं रहेका छन्।
घाइतेहरूको राचुली नगर अस्पतालमा प्राथमिक उपचारपछि थप उपचारका लागि कर्णाली स्वास्थ्य विज्ञान प्रतिष्ठान जुम्ला पठाइएको छ।
प्रहरीको प्रारम्भिक अनुमान अनुसार, गाडीको ब्रेक फेल भएर दुर्घटना भएको हो। घटनाबारे थप अनुसन्धान जारी रहेको जिल्ला प्रहरी कार्यालयले जनाएको छ।
- Jigyasa media
