काठमाडौं । प्रतिनिधिसभा सदस्य निर्वाचनका लागि उम्मेदवारी दिएका उम्मेदवारको नामावली आज सार्वजनिक गरिने भएको छ। निर्वाचन आयोगका अनुसार उम्मेदवारी पत्र र उम्मेदवारविरुद्ध दर्ता भएका उजुरीमाथि जाँचबुझ गरी आवश्यक निर्णयपछि आज साँझ ५ बजेसम्म उम्मेदवारको नामावली प्रकाशन गरिनेछ।

आयोगले यसअघि माघ ७ गते बुधबार उम्मेदवारविरुद्ध उजुरी दर्ता गर्न समय दिएको थियो। दर्ता भएका उजुरीको छानबिन सम्पन्न गरी योग्य ठहरिएका उम्मेदवारको सूची सार्वजनिक गर्न लागिएको हो।

निर्वाचन तालिकाअनुसार माघ ९ गते बिहान १० बजेदेखि दिउँसो १ बजेसम्म उम्मेदवारले आफ्नो नाम फिर्ता लिन सक्नेछन्। त्यसै दिन दिउँसो १ बजेदेखि ३ बजेसम्म अन्तिम नामावली प्रकाशन गरिने छ भने अपराह्न ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गरिने आयोगले जनाएको छ।

आयोगका अनुसार आगामी फागुन २१ गते प्रतिनिधिसभा सदस्य निर्वाचन हुँदैछ। निर्वाचनलाई स्वच्छ, निष्पक्ष र मर्यादित बनाउन सबै प्रक्रिया समयमै र कानुनअनुसार अघि बढाइँदै आएको आयोगको भनाइ छ।

उम्मेदवारी दर्ताका क्रममा देशभरका निर्वाचन कार्यालयमा उल्लेख्य चहलपहल देखिएको थियो। 

निर्वाचन प्रक्रिया निर्णायक चरणमा प्रवेश गरेसँगै राजनीतिक दल र उम्मेदवारहरूको गतिविधि तीव्र बन्दै गएको छ।

• Jigyasanepal