२४ भदौ, काठमाडौं ।
प्रधानमन्त्री केपी शर्मा ओलीले पदबाट राजीनामा दिएसँगै मुलुक नयाँ राजनीतिक अन्यौलतर्फ धकेलिएको छ । आन्दोलनकारीले ताजा जनादेशसहितको अन्तरिम नागरिक सरकार गठनको माग अघि सारिरहेका छन् भने संविधानविद्हरूले भने संसद र संवैधानिक प्रक्रियाबाटै निकास खोज्नुपर्ने सुझाव दिएका छन् ।
जेनजी आन्दोलनका प्रमुख अगुवाहरूले सोमबार विज्ञप्ति जारी गर्दै प्रधानमन्त्रीको राजीनामा र ताजा जनादेशका लागि म्याडेटप्राप्त नागरिक सरकार गठन गर्नुपर्ने माग राखेका थिए । आन्दोलनकारी अभिजित अधिकारी, युजन राजभण्डारी, रक्षा बम, प्रदीप ज्ञवाली, मनिष खनाल, तनुजा पाण्डे र विनोद देउवाले जारी गरेको विज्ञप्तिमा ५ बुँदे मागमध्ये नागरिक सरकार गठन दोस्रो प्रमुख एजेन्डा रहेको उल्लेख छ ।
तर, संविधान अनुसार नयाँ प्रधानमन्त्री संसदकै बाटोबाट चयन हुनुपर्ने प्रावधान छ । संविधानविद् टिकाराम भट्टराईका अनुसार, “राजनीतिक समाधान संविधान र संसदको बाटोमै खोज्नुपर्छ । आन्दोलनकारीको भावनालाई सम्बोधन गर्ने तर संविधानको दायराभित्रै समाधान गर्नुपर्ने हुन्छ ।”
यद्यपि आन्दोलनकारी पक्षले नागरिक सरकार गठनका लागि आफ्ना नेता तय गर्ने, सर्वदलीय वा सर्वपक्षीय सहमति जुटाउने र त्यसपछि राष्ट्रपतिबाट नियुक्त गर्ने प्रक्रियाबारे अझै स्पष्टता दिन सकेका छैनन् ।
यसबीचमा मुलुकभर आन्दोलनले चर्को रूप लिँदै गएको छ । आन्दोलनकारीहरू ताजा जनादेशबिनै गठन हुने सरकारलाई अस्वीकार गर्ने चेतावनी दिइरहेका छन् । अर्कोतर्फ, सबैलाई स्वीकार्य हुने व्यक्तित्व अगाडि आएर वर्तमान अराजकता र अनिश्चिततालाई रोक्नुपर्ने आवाज पनि बढ्दो छ ।
अबको प्रश्न के हो भने — देश संवैधानिक प्रक्रियाबाटै निकास खोज्ने हो कि आन्दोलनकारीको दबाबअनुसार नयाँ प्रयोग स्वरूप नागरिक सरकारतर्फ जाने हो ? यही मोडमा नेपालको राजनीतिक भविष्य उभिएको छ ।
-
Jigyasanepal
