काठमाडौं।
नेकपा एमालेको नयाँ नेतृत्व चयनका लागि आज (बुधबार) निर्वाचन हुँदैछ। पटक–पटक सारिएको मतदान प्रक्रिया अन्ततः आज बिहान ८ बजेदेखि सुरु हुने एमाले नेताहरूले मंगलबार राति नै जानकारी दिएका छन्।
एमालेको ११औँ महाधिवेशन जारी रहेको काठमाडौंको भृकुटीमण्डपमा विद्युतीय भोटिङ मेसिनमार्फत मतदान हुने व्यवस्था गरिएको छ। पार्टी नेतृत्व चयनका लागि प्रविधिको प्रयोग गर्दै गरिएको यो निर्वाचनलाई चासोका साथ हेरिएको छ।
नेतृत्वको प्रतिस्पर्धामा वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल आ–आफ्नो प्यानलसहित चुनावी मैदानमा उत्रिएका छन्। दुवै पक्षले महाधिवेशन प्रतिनिधिसँग अन्तिम चरणको मत माग्ने अभियान तीव्र पारेका छन्।
महाधिवेशनको निर्णायक मोडमा पुगेको यस निर्वाचनले एमालेको आगामी कार्यदिशा, संगठनात्मक संरचना र राजनीतिक रणनीतिमा महत्वपूर्ण प्रभाव पार्ने अपेक्षा गरिएको छ।
-
Jigyasanepal
