काठमाडौं, १५ असोज – केही दिनको खुला मौसमपछि कोशी प्रदेशमा आजदेखि फेरि बदली सुरु भएको छ। जल तथा मौसम विज्ञान विभागको पूर्वानुमान महाशाखाले कोशीमा बादलले छोपिसकेको र यसको प्रभाव मधेस, बागमती, र गण्डकी प्रदेशसम्म देखिने जानकारी दिएको छ।

मौसमविद् प्रतिभा मानन्धरका अनुसार कोशी प्रदेशमा हल्कादेखि मध्यम वर्षा हुनेछ भने मधेस, बागमती, र गण्डकी प्रदेशमा समेत यसको प्रभाव पर्नेछ। सुदूरपश्चिम, कर्णाली, र लुम्बिनीमा भने वर्षाको सम्भावना कम छ। यो अवस्था भोलि र पर्सीसम्म जारी रहने भए पनि ठूलो र निरन्तर वर्षा हुने सम्भावना भने नरहेको उनले बताइन्।

तर, यसअघिको अविरल वर्षाले देशका धेरै भाग गलेका कारण थोरै पानीले पनि बाढीपहिरोको जोखिम उच्च रहेको जनाइएको छ। हाल देशभर मनसुनी वायुको प्रभाव कायमै छ भने भारतको मध्य प्रदेश नजिकको न्यून चापीय प्रणालीले नेपालमा आंशिक प्रभाव पारिरहेको छ।

विभागका अनुसार आज राति कोशीसहित देशका पहाडी क्षेत्रमा आंशिकदेखि साधारण बदली हुनेछ र हल्कादेखि मध्यम वर्षा पनि हुने सम्भावना छ। असोज १६ र १७ गते कोशी, मधेस, बागमती, र गण्डकी प्रदेशमा हल्कादेखि मध्यम वर्षा जारी रहनेछ। कोशी प्रदेशका केही स्थानमा भारी वर्षा हुने सम्भावना पनि रहेको विभागले जारी गरेको बुलेटिनमा उल्लेख छ।

• Jigyasa media